১৯৫০ চনৰ ২৮ অক্টোবৰ তাৰিখে তেজপুৰত জন্ম হয়।
তেওঁ একাধাৰে এগৰাকী প্ৰসিদ্ধ লেখক, কণ্ঠশিল্পী, গীতিকাৰ, সুৰকাৰ, সংগীত ব্যৱস্থাপক আৰু সমাজকৰ্মী।
তেখেতৰ দেউতাকৰ নাম চন্দ্ৰকান্ত গোস্বামী, তেওঁ মূৰাৰী সত্ৰৰ সত্ৰাধিকাৰ আৰু মাকৰ নাম পদ্মা দেৱী আছিল।
দ- বেছেৰীয়াৰ পৰা প্ৰাথমিক শিক্ষা গ্ৰহন কৰে।
বেছেৰীয়া হাইস্কুলৰ পৰা মেট্ৰিকত প্ৰথম বিভাগত উত্তীৰ্ণ হৈ দৰং কলেজত বিজ্ঞান শাখাত নামভৰ্তি কৰি ১৯৭৩ চনত ‘ৰসায়ন বিজ্ঞান’ত অনাৰ্চসহ স্নাতক ডিগ্ৰী লাভ কৰে।
দৰং কলেজৰ পৰা ওলায়েই তেজপুৰ একাডেমীত বিজ্ঞানৰ শিক্ষক হিচাপে আঢ়ৈবছৰ কাল শিক্ষকতা কৰে৷
তাৰ পাছত তেজপুৰৰ পৰা নামৰূপলৈ গৈ নামৰূপ তাপ বিদ্যুৎ কেন্দ্ৰত এচিষ্টেণ্ট কেমিষ্ট হিচাপে ১৯৭৬ চনতূ চাকৰিত যোগদান কৰে৷
নামৰূপ তাপ বিদ্যুৎ কেন্দ্ৰৰ পৰা চন্দ্ৰপুৰ তাপ বিদ্যুৎকেন্দ্ৰ , মুখ্য কাযাৰ্লয় বিজুলী ভৱন আদিলৈ পদোন্নতিসহ বদলি হৈ ২০১২ চনত পুনৰ নামৰূপ তাপ বিদ্যুৎ কেন্দ্ৰৰ পৰা সহকাৰী কেন্দ্ৰ সঞ্চালক হিচাপে অৱসৰ গ্ৰহণ কৰে৷
তেওঁ জন্ম হোৱা গাঁওখনত সৰুৰে পৰা গীত – মাতৰ লগতে অভিনয়ৰো অভিজ্ঞতা অৰ্জন কৰিছিল।
ভাওনা, নাটক আদিত শিশু চৰিত্ৰত অভিনয় কৰাৰ উপৰিও ওচৰ-পাজৰৰ গাঁৱৰ লগতে তেজপুৰৰ বাণ থিয়েটাৰতো শৈশৱতে নিজৰ প্ৰতিভাৰ পৰিচয় দিবলৈ সক্ষম হৈছিল।
তেওঁ হাইস্কুল টুণাৰ্মেণ্টৰ গীত-মাতৰ প্ৰতিযোগিতাত যোগদান কৰি কৃতিত্ব অৰ্জন কৰাৰ লগতে জনপ্ৰিয়তা অৰ্জন কৰিছিল।
দৰং কলেজত বছৰেকীয়া গীত-মাতৰ প্ৰতিযোগিতাত অংশগ্ৰহণ কৰি সৰ্বশ্ৰেষ্ঠ গায়কৰ সন্মান অৰ্জন কৰে।
তেজপুৰ থকাৰ সময়ছোৱাত ঐতিহ্যমণ্ডিত বাণ থিয়েটাৰৰ সৈতে ওতঃপ্ৰোত ভাৱে জড়িত হৈ পৰে আৰু বিষ্ণু প্ৰসাদ ৰাভা, ফনী শৰ্মা, চন্দ্ৰধৰ গোস্বামী, অজিত সিংহ, দিলীপ চৌধুৰী প্ৰমুখ্যে অগ্ৰজ বৰেণ্য শিল্পীসকলৰ সান্নিধ্য লাভ কৰে।
মঘাই বোলে ঢোলৰ মাত, আমোলমোল শেৱালিৰ গোন্ধ আদি চিৰসেউজ গীতসমূহৰ জৰিয়তে তেওঁ ব্যাপকভাৱে জনপ্ৰিয়তা লাভ কৰিবলৈ সক্ষম হৈছিল।
তেওঁ ডিব্ৰুগড় আকাশবাণী কেন্দ্ৰৰ সৈতেও সংযোগ স্থাপন কৰিছিল।
১৯৭৮ চনৰ পৰা আকাশবাণীৰ নিয়মীয়া আধুনিক গানৰ শিল্পী হিচাপে স্বীকৃতি লাভ কৰে।
নামৰূপত থকা সময়ছোৱাতে তেখেতে ১৯৮২ চনত ডিব্ৰুগড়ত গঠিত ’সদৌ অসম জনসাংস্কৃতিক পৰিষদৰ’ এগৰাকী সক্ৰিয় উদ্যোক্তা আছিল।
উল্লেখযোগ্য যে ড° ভূপেন হাজৰিকা এই জনসাংস্কৃতিক পৰিষদৰ প্ৰতিষ্ঠাপক সভাপতি আছিল।
তেতিয়াৰ পৰাই তেওঁ ড° ভূপেন হাজৰিকাক অতি ঘনিষ্ঠভাৱে লগপোৱাৰ সুবিধা লাভ কৰে।
পৰিষদৰ জন্মলগ্নতে জনসাংস্কৃতিক পৰিষদৰ দ্বাৰা প্ৰযোজিত বিষ্ণু প্ৰসাদ ৰাভাৰ গীতৰ একমাত্ৰ লংপ্লেয়িং ৰেকৰ্ড ‘বিশ্বৰে ছন্দে ছন্দে’ৰ গোস্বামী আছিল অন্যতম উদ্যোক্তা।
তেখেতৰ কেছেট আৰু চিডি এলবাম কেইটা হৈছেঃ
ক) আমোলমোল শেৱালিৰ গোন্ধ।
খ) জন হেনৰী (গণশিল্পী হেমাংগ বিশ্বাসৰ গানৰ সংকলন)।
গ) একৈশ শতিকাৰ দুৱাৰ-ডলিত (পৰৱৰ্তী ‘হাঁহিৰে জীৱন সুন্দৰ কৰা’)।
২০১৯ চনৰ ১৪ ছেপ্টেম্বৰত তেখেতক অসম জাতীয়তাবাদী যুৱ ছাত্ৰ পৰিষদে “মঘাই ওজা বঁটা” প্ৰদান কৰে।
জিকিৰ সম্ৰাট ৰেকিবুদ্দিন আহমেদ বঁটাও তেখেতে লাভ কৰে।
তেখেৰ কেইখনমান উল্লেখযোগ্য গ্ৰন্থ হ’লঃ মাটি আৰু মানুহৰ শিল্পী হেমাংগ বিশ্বাস, ড° ভূপেন হাজৰিকা জনসাংস্কৃতিক পৰিক্ৰমা, আমাৰ পাৰ্বতী প্ৰসাদ জীৱন আৰু গান, কত শিল্পী কত দুখ, দেশ ভাগিলেও সমাজখন নেভাগক, উভতি চোৱাৰ হেঁপাহ, প্ৰগতিশীল সংস্কৃতি, হেমাংগ বিশ্বাস আৰু অসম ইত্যাদি।
তেখেতৰ উপজা দিনত Rnewsindia24 পৰিয়ালৰ তৰফৰ পৰা শুভকামনা জনালোঁ।
এনে মহান ব্যক্তিসকলৰ জীৱনযাত্ৰাৰ বিষয়ে জানি থাকিবৰ বাবে চাই থাকিব www.rnewsindia24.com
মিচিং স্বায়ত্বশসিত পৰিষদৰ সাংস্কৃতিক বিভাগৰ আঁচনিৰ বিষয়ে জানিবলৈ চাওঁক এই বিজ্ঞাপন।
News Editor Sangita Dutta R News India 24
