আজি কামৰূপী লোকগীতৰ মুকুট বিহীন সম্ৰাট ৰামেশ্বৰ পাঠকৰ জন্মতিথি।
অসমীয়া জাতিটোক সুললিত কণ্ঠেৰে দশক দশকজুৰি সমৃদ্ধ কৰিছিল ৰামেশ্বৰ পাঠকে।
অসমৰ লোকজীৱনৰ জীৱনশৈলী আৰু মাটিৰ সুৰক প্ৰতিগৰাকী অসমীয়াৰ বুকুলৈ বোৱাই লৈ গৈছিল তেখেতে।
আজি জানো আঁহক, বৰেণ্য শিল্পী গৰাকীৰ চমু জীৱনযাত্ৰা –
ৰামেশ্বৰ পাঠক জন্ম হৈছিল ১৯৩৮ চনৰ ১ মাৰ্চ তাৰিখে অসমৰ বৰপেটা জিলাৰ ভেল্লাত।
১৯৫৮ চনত স্কুলীয়া শিক্ষা সাং কৰাৰ পিছত
বৰপেটাৰ মাধৱ চৌধুৰী মহাবিদ্যালয়ত নামভৰ্তি কৰে।
সেই সময়তে এখেতে সংগীত শিক্ষাতো মনোনিৱেশ কৰিবলৈ লয়।
পণ্ডিত দয়াল চন্দ্ৰ সূত্ৰধাৰৰ তত্ত্বাৱধানত ৰামেশ্বৰ পাঠকে বৰগীত প্ৰাৰম্ভিক শিক্ষা গ্ৰহণ কৰে।
১৯৬১ চনত গুৱাহাটীত অনুষ্ঠিত হোৱা আন্তঃমহাবিদ্যালয় যুৱ মহোৎসৱত বৰপেটাৰ মাধৱ চৌধুৰী মহাবিদ্যালয়ৰ হৈ ৰামেশ্বৰ পাঠকে বৰগীত, আধুনিক গীত, ভজন তথা গজল শাখাত প্ৰথম স্থান অধিকাৰ কৰিছিল।
১৯৬৩ চনত শ্ৰী পাঠকে গুৱাহাটীৰ আৰ্য্য বিদ্যাপীঠত শিক্ষক হিচাপে চাকৰি জীৱন আৰম্ভ কৰে।
গুৱাহাটীৰ আৰ্য্য বিদ্যাপীঠত চাকৰি কৰি থাকোঁতে বিদ্যালয়ৰ ছাত্ৰ-ছাত্ৰী তথা শিক্ষক মহলৰ মাজত এগৰাকী কণ্ঠশিল্পী হিচাপে ৰামেশ্বৰ পাঠক জনপ্ৰিয় হৈ পৰে।
সেইসময়তে সহকৰ্মী আফজল হুচেইনৰ কথা পেলাব নোৱাৰি গুৱাহাটীৰ অনাতাঁৰ কেন্দ্ৰত অ’ডিচন দি সংগীত জীৱনৰ আৰম্ভণি কৰে।
১৯৭৪ চনত বৰপেটাৰ ধনদা বৰ্মনৰ (পাচলৈ ধনদা পাঠক হিচাপে খ্যাত) সৈতে ৰামেশ্বৰ পাঠক বিবাহপাশত আৱদ্ধ হয়।
পিছলৈ দুয়ো একেলগে সংগীত পৰিৱেশন কৰি জনপ্ৰিয় হৈ পৰে।
ৰামেশ্বৰ পাঠক-ধনদা পাঠক যুতিয়ে কেবাখনো গ্ৰামোফোন ৰেকৰ্ডৰ উপৰিও প্ৰায় ডেৰ শতাধিক অসমীয়া লোকগীতৰ কেছেটত কণ্ঠদান কৰিছিল।
১৯৯০ চনত ৰামেশ্বৰ পাঠক “সংগীত নাটক একাডেমী বঁটা” সন্মানেৰে বিভূষিত হয়।
ৰামেশ্বৰ পাঠকে অসমৰ উপৰিও দিল্লী, বাংগালোৰ, মুম্বাই, উৰিষ্যা, কলিকতা আদিত থলুৱা অসমীয়া কামৰূপী লোকগীত পৰিৱেশন কৰে।
২০১০ চনৰ ৩ ডিচেম্বৰত ৭৪ বছৰ বয়সত গুৱাহাটীৰ জি.এন.আৰ.চি.ত ৰামেশ্বৰ পাঠকে জীৱন নাটৰ সামৰণি মাৰে।
প্ৰখ্যাত শিল্পীগৰাকী যুগ যুগান্তৰলৈ অসমীয়া লোকসংগীতৰ ক্ষেত্ৰখনত তেখেতৰ নাম সোণালী আখৰেৰে জিলিকি থাকিব ৷
এনেধৰণৰ মহান ব্যক্তি সকলৰ চমু জীৱনযাত্ৰা জানি থাকিবৰ কৰে নিয়মীয়াকৈ পৰিদৰ্শন কৰিব Rnewsindia24.com
Sangita Dutta Editor in Chief Rnewsindia24.com
