অসম সাহিত্য সভাৰ দশমগৰাকী সভাপতি, দেশভক্ত তৰুন ৰাম ফুকন ।

তৰুন ৰাম ফুকনঃ

ভাৰতৰ স্বাধীনতা আন্দোলনৰ এগৰাকী অসমৰ নেতা, অসম সাহিত্য সভাৰ দশমগৰাকী সভাপতি, দেশভক্ত, এগৰাকী সুবক্তা, লেখক, অসমৰ তৃতীয়জন বেৰিষ্টাৰ, Darling of Assam, অসমত চাইকেল চলোৱা প্ৰথম গৰাকী ব্যক্তি আছিল।

তেওঁৰ জন্ম হৈছিল ১৮৭৭ চনৰ ২২ জানুৱাৰী তাৰিখে গুৱাহাটীৰ ভৰলুমুখত জন্ম হয়।

পিতৃৰ নাম বলৰাম ফুকন আৰু মাতৃৰ নাম ভাগীৰথী।

জীৱনৰ প্ৰথমছোৱাত তেখেতে ঘৰতেই গুৰুৰ অধীনত সংস্কৃত শিক্ষা গ্ৰহণ কৰিছিল।

গুৱাহাটীৰ কলেজিয়েট স্কুলৰ পৰা ১৮৯৫ চনত প্ৰবেশিকা পৰীক্ষাত উত্তীৰ্ণ হয়।

কলিকতাৰ প্ৰেচিডেন্সী কলেজৰ পৰা তেওঁ এফ এ পাছ কৰি, বি এ ত নামভৰ্তি কৰে।

কিন্তু বি এ পৰীক্ষা নিদিয়াকৈয়ে লণ্ডনত বেৰিষ্টাৰি পঢ়িবলৈ যায়।
তেখেত আছিল অসমৰ তৃতীয়জন বেৰিষ্টাৰ।

উকিলৰ বৃত্তিৰে নিজৰ কৰ্মজীৱনৰ পাতনি মেলি তেওঁ গুৱাহাটীৰ আৰ্ল ল কলেজত কিছুদিন শিক্ষকতা কৰে৷

১৯২০ চনত তেওঁ “স্তুতিমালা” নামৰ এটি স্তুতি-কবিতা লিখে৷

১৯২১ চনত তৰুণ ৰাম ফুকনে ভাৰতৰ স্বাধীনতা সংগ্ৰামত যোগ দিয়ে।

১৯২৪ চনত গুৱাহাটী লোকেল ব’ৰ্ডৰ প্ৰথমগৰাকী বেচৰকাৰী চেয়াৰমেন হিচাপে তৰুণৰাম ফুকন নিৰ্বচিত হৈছিল।

এই পদত থাকি তেওঁ গুৱাহাটীৰ বাট-পথ, বিদ্যালয়, চিকিৎসালয়ৰ গৃহ আদি নিৰ্মাণ কৰিছিল।

১৯২৭ চনৰ অসম সাহিত্য সভাৰ গোৱালপাৰা অধিৱেশনৰ তেখেত সভাপতি আছিল।

তৰুণৰাম ফুকন এগৰাকী দুঃসাহসী চিকাৰী আছিল৷

তেওঁৰ লোমহৰ্ষক চিকাৰ কাহিনীসমূহ অসমীয়া সাহিত্যৰ বহুমূলীয়া সম্পদ৷

তেওঁ এজন বেৰিষ্টাৰ ৰূপে বিশেষ সাফল্য লাভ কৰিছিল তেওঁ এগৰাকী সুবক্তা ও আছিল।

তেখেতৰ ভাষণবোৰ মধুৰ, গধুৰ বিষয়তো মধুৰতা সানি হাঁহি উঠা কথাৰে হহুৱাব পৰা ক্ষমতা আছিল।

ভাৰত সভাত কেন্দ্ৰীয় সভাই তেওঁক নাম দিছিল “Darling of Assam’’।

তেখেতৰ কৰ্ম আৰু চিন্তাধাৰাতে অসমৰ নাম বাহিৰত জনাজাত হৈ পৰিছিল।

দেশপ্ৰেমৰ কামত তেওঁ কেতিয়াও পিছ হুঁহকি অহা নাছিল।

তেওঁ স্বাধীনতা আন্দোলনত আগবঢ়োৱা সেৱাৰ বাবে ফুকনক ‘দেশভক্ত‘ উপাধিৰে বিভূষিত কৰা হৈছিল।

কলিকতাত পঢ়ি থকা অৱস্থাত তেওঁ চাইকেল চলাই ঘূৰা-পকা কৰিছিল৷

সেইসময়ত চাইকেল চলোৱাটো সম্ভ্ৰান্ত পৰিয়ালৰ কাম বুলি বিবেচিত হৈছিল৷

তেওঁ অসমত চাইকেল চলোৱা প্ৰথম গৰাকী ব্যক্তি হিচাপে পৰিচয় দিব পাৰিছিল।

তেখেতে বিভিন্ন কাকত–আলোচনীত কবিতা-প্ৰবন্ধ আদি প্ৰকাশৰ মাধ্যমেৰে সাহিত্য সাধনা কৰিছিল।

মুঠ ৫৪ টা কবিতা তেখেতে লিখিছিল।
ভাষণাৱলী আৰু সাহিত্যিক জীৱনৰ কীৰ্তিস্তম্ভ বুলি বিবেচিত “চিকাৰ কাহিনী’’ গ্ৰন্থখন তেওঁৰ অসমীয়া সাহিত্যলৈ আগবঢ়াই থৈ গৈছে।

সাহিত্যিক অতুল চন্দ্ৰ বৰুৱাই আলোচনা প্ৰসংগত তৰুণৰাম ফুকন সম্বন্ধে কৈছিল চিকাৰী ফুকন, সভা শুৱনী ফুকন, দেশভক্ত ফুকন, ছাত্ৰবন্ধু ফুকন, সাহিত্যিক ফুকন, বেৰিষ্টাৰ ফুকন, ৰসিক ফুকন, অশ্বাৰোহী ফুকন, বৰশী বোৱা কানাই ফুকন আদি নানাভাৱে মানুহে তেওঁক জানিছিল আৰু বুজিছিল৷

১৯৩৯ চনৰ ২৮ জুলাইত তেখেত মৃত্যু হয়।

তেখেতৰ মৃত্যু দিনটো ২০২১ চনৰ ২৮ জুলাই তাৰিখে অসম চৰকাৰে “দেশভক্তি দিৱস” হিচাপে পালন কৰা হ’ব বুলি ঘোষণা কৰে।

ভাৰতৰ স্বাধীনতা সংগ্ৰামৰ ইতিহাসত জনসাধাৰনৰ মাজত দেশপ্ৰেমৰ ভাৱ জগাই তোলা, দেশভক্ত তৰুনৰাম ফুকন দেৱৰ মৃত্যু বাৰ্ষিকীত Rnewsindia24 পৰিয়ালে গভীৰ শ্ৰদ্ধাঞ্জলী জনাইছোঁ।

 

R News India 24 ৰ বাতৰি নিয়মীয়াকৈ পঢ়ক আৰু নিয়মীয়াকৈ উপহাৰ লাভ কৰক। সবিশেষ জানিবলৈ R News India 24ত যোগাযোগ কৰক ধন্যবাদ।

 

সংগীতা দত্তৰ প্ৰতিবেদন R News India 24