আজি পৱিত্ৰ মহালয়া ।
মহা মানে ‘পৰম’ আৰু লয় মানে বিলীন হোৱা।
আন এটা দাৰ্শনিক মত অনুসৰি লয় মানে তৰংগ অৰ্থাৎ য’ৰ পৰা আকৰ্ষণ-বিকৰ্ষণ শক্তিৰ সৃষ্টি হয়।
তাৎপৰ্যটো হ’ল যি পৰম-তত্ত্বৰ পৰা সকলো তত্ত্বৰ জন্ম হয় আৰু য’ত সকলো বিলীন হৈ যায় সেয়ে মহালয়া।
মহালয়াৰ এই পবিত্ৰ দিনটোত দেৱী মাক পূজা, আৰাধনা, স্তুতি–মিনতিৰে ভক্তি অৰ্ঘ প্ৰদান কৰিবলৈ পুৱতি নিশাৰে পৰা ৰাজ্যত প্ৰৱল উৎসাহ।
আহিন মাহৰ এই দিনটোক সকলো পূৰ্বপুৰুষে অমাৱস্যা বুলি কয়।
পৰম্পৰাগত প্ৰথা অনুসৰি পূৰ্ণিমা আৰু অমাৱশ্যাৰ এক সুকীয়া তাৎপৰ্য্য আৰু স্থান আছে।
মহালয়াই পৃথিৱীলৈ শুভ আগমন জনালে মা দুৰ্গাক ।
বৰ্তমান সময়ত সকলোতে মা দুৰ্গাক আদৰাৰ ব্যাপক প্ৰস্তুতি।
সকলোৰে মাজত আনন্দ উৎসাহ উদ্দিপনা।
শৰতৰ ভাল লগা দিনবোৰ যেন এতিয়া দুৱাৰদলিত।
গ্ৰীষ্মৰ উত্তাপ আঁতৰাই কাতিৰ মিঠা পৰশ সানিবলৈ শৰতৰ আগমন।
শৰৎ আৰু শেৱালীৰ দুয়োৰে এক মধুৰ সম্পৰ্ক।
শেৱালিক বাদ দি শৰতৰ কথা ভাবিব নোৱাৰি আৰু শৰতক বাদ দি শেৱালিৰ কথা ভাবিব নোৱাৰি।
শৰতেই লৈ আহে ধৰাৰ বুকুলৈ আশাৰ বতৰা।
শৰতৰ আগমনত সকলোৰে মন মতলীয়া।
আনন্দত সকলো আপোন পাহৰা।
শেৱালি, বকুল ফুলৰ সুৰভীত চৌপাশ আমোলমোলায়।
শেৱালিয়ে বাট দেখুৱালেহে শৰৎ আহে।
শেৱালীয়ে নিশা ফুলি সুবাস বিলাই,পুৱা হ’লে ই সুৰুযৰ স্পৰ্শপালেই মুখ গুজি দুবৰিত পৰি ৰয়।
উফ্ঃ
দুবৰি বনত নিয়ৰৰ টোপালবোৰ ৰ’দৰ কিৰণত তিৰবিৰাই উঠে।
ইফালে নৈৰ দাঁতিত কহুৱা ফুলে।
কহুৱাই হালি-জালি নাচি শৰতক আদৰণি জনায়।
সেউজীয়া পথাৰ খনি ও যৌৱন প্ৰাপ্ত হয় শৰতৰ বুকুত।
শাৰদী ৰাণীক আদৰিবলৈ সকলো সাজু হৈছে ।
হিন্দু ধৰ্মত পিতৃ অমাৱশ্যাক মহালয়া অমাৱস্য বুলিও কোৱা হয়।
মহালয়াৰ পৰাই শাৰদীয় দুৰ্গোৎসৱ আৰম্ভ হয়।
হিন্দু পৌৰাণিক কাহিনী অনুসৰি, বিশ্বাস কৰা হয় যে আজিৰ দিনটোতে ব্ৰহ্মা, বিষ্ণু আৰু মহেশ্বৰে অসুৰ মহিষাসুৰক পৰাস্ত কৰিবলৈ দেৱী দুৰ্গাক সৃষ্টি কৰিছিল।
সনাতন ধৰ্মত আজিৰ দিনটোত পূৰ্বপুৰুষসকলৰ বাবে বিভিন্ন ধৰণৰ খাদ্য প্ৰস্তুত কৰি আগবঢ়াই দিয়াৰ প্ৰথা আছে।
এই সময়ত পূৰ্বপুৰুষসকলে পৃথিৱীলৈ আহি নিজৰ পৰিয়ালক আশীৰ্বাদ দিয়ে বুলি বিশ্বাস কৰা হয়।
এই দিনটোত বহু ধৰণৰ খাদ্য প্ৰস্তুত কৰি কাউৰী, গৰু, কুকুৰক খুৱাব লাগে।
ইয়াৰ উপৰিও এই দিনটোত ব্ৰাহ্মণক খাদ্য দান কৰাটোও অতি গুৰুত্বপূৰ্ণ বুলি গণ্য কৰা হয়।
এনে কৰিলে ব্যক্তিজনে পিতৃ দোষৰ পৰা মুক্তি পায় আৰু লগতে চাকৰি বৃত্তিত সন্মুখীন হোৱা সমস্যাৰ পৰাও মুক্তি পায়।
মা দুৰ্গা আগমনে সকলোকে মংগল কৰক, শক্তি দিয়ক আৰু ভালে ৰাখক।
শুভ মহালয়া।
News Editor Sangita Dutta Reports R News India 24
