Skip to content
১৯২৪ চনৰ ২৫ ডিচেম্বৰ তাৰিখে মধ্যপ্ৰদেশ ৰাজ্যৰ গোৱালিয়ৰৰ এক ব্ৰাহ্মণ পৰিয়ালত জন্মগ্ৰহণ কৰা অটল বিহাৰী বাজপেয়ীৰ পিতৃৰ নাম আছিল কৃষ্ণ বিহাৰী বাজপেয়ী আৰু মাতৃৰ নাম আছিল কৃষ্ণা দেৱী ।
গোৱালিয়ৰৰ শিশু বিদ্যা মন্দিৰত স্কুলীয়া শিক্ষাৰ পাতনি মেলা বাজপেয়ীয়ে হিন্দী,ইংৰাজী আৰু সংস্কৃত – এই তিনিওটি বিষয়তে স্নাতক ডিগ্ৰী লাভ কৰাৰ পাছত আগ্ৰা বিশ্ববিদ্যালয়ৰ পৰা ৰাজনীতি বিজ্ঞান বিষয়ত স্নাতকোত্তৰ ডিগ্ৰী সম্পূৰ্ণ কৰে।
এইজনা বিদ্বান ব্যক্তি ভাৰতীয় জনতাৰ মাজত কেৱল যে এজন এজন জনপ্ৰিয় ৰাজনীতিকেই আছিল তেনে নহয় ; ৰাজনীতিৰ উৰ্দ্ধতো তেখেত আছিল ভাৰতৰ জনসমাজ আৰু যুৱচামৰ মাজলৈ বহু প্ৰেৰণাদায়ী চিন্তা-চেতনাৰ প্ৰৱাহ বোৱাই অনা এগৰাকী স্বনামধন্য কবি তথা সাহিত্যিক ।
নিজ জীৱনকালত হ্ৰস্বকালীন আৰু সম্পূৰ্ণ পৰ্যায়ত মুঠ তিনিবাৰকৈ ভাৰতৰ সন্মানীয় প্ৰধানমন্ত্ৰীৰ আসন শুৱনি কৰা অটল বিহাৰী বাজপেয়ী আছিল ভাৰতীয় জনতা পাৰ্টিৰ এগৰাকী জ্যেষ্ঠ কৰ্মী তথা ৰাষ্ট্ৰীয় স্বয়ংসেৱক সংঘৰ এগৰাকী নিষ্ঠাৱান সেৱক ।
তেখেতেই ভাৰতৰ প্ৰথমগৰাকী প্ৰধানমন্ত্ৰী, যি ভাৰতীয় জাতীয় কংগ্ৰেছক প্ৰতিনিধিত্ব কৰাৰ বিপৰীতে আন কোনো দলক প্ৰতিনিধিত্ব কৰিছিল ।
ভাৰতীয় জনতাৰ অন্তৰে অন্তৰে এজন বৰ সৎ, বিচক্ষণ আৰু সুসশাসক হিচাপে স্থান গ্ৰহণ কৰা এইজনা প্ৰধানমন্ত্ৰীৰ দিনতেই ১৯৯৮ চনত পোখৰাণ -২ ৰ নিউক্লিয়েৰ সফল পৰীক্ষণ সম্পন্ন হৈছিল ।
আনহাতে, যুদ্ধৰ পাছতো পাকিস্তানৰ সৈতে ভাৰতৰ কূটনৈতিক সুসম্পৰ্ক প্ৰতিষ্ঠা কৰাত তেখেতৰ সক্ৰিয় ভূমিকা আছিল অতুলনীয় ।
তাৰোপৰি, দেশৰ আৰ্থসামাজিক উন্নয়নৰ বাবে অহোপুৰুষাৰ্থ কৰা অটল বিহাৰী বাজপেয়ীদেৱে দেশৰ ঘৰুৱা অৰ্থনৈতিক দিশৰ উন্নয়ণ, আন্তঃগাঠনিৰ পুনৰ্নিমান, বৈদেশিক ক্ষেত্ৰত মূলধন খটুওৱা, ব্যক্তিগত খণ্ডৰ বিকাশ, চৰকাৰী ধনৰ অপচয় ৰোধকে আদি কৰি এনে বহু ক্ষেত্ৰৰ গৱেষণা আৰু ব্যৱস্থাপনাৰ দিশত বিশেষভাবে মনোযোগ প্ৰদান কৰি দেশৰ সৰ্বাংগীন উন্নতিৰ বাট সুচল কৰিছিল ।
অটল বিহাৰী বাজপেয়ীদেৱৰ কলা-সাহিত্যকৰ্ম সমূহৰ ভিতৰত কাব্যসংকলন তথা কবিতা আবৃত্তিৰ সংকলন – ‘টুৱেণ্টী ওৱান পোৱেমছ’, ‘ক্যা খোয়া ক্যা পায়া’ ,’ ব্যক্তিত্ব ঔৰ কৱিতায়েঁ’ , ‘নয়ীঁ দিশা’ আৰু ‘সমৱেদনা’ (জগজিৎ সিং) আদি লেখত ল’বলগীয়া ।
আনহাতে নিজ জীৱনকালত তেখেতে বহুকেইখন সামাজিক তথা ৰাজনৈতিক বিষয়ক গ্ৰন্থ আৰু জীৱনীমূলক গ্ৰন্থ ৰচনা কৰি গ’ল । ১৯৯৩ চনত কানপুৰ বিশ্ববিদ্যালয়ে তেখেতৰ প্ৰতি সন্মান জ্ঞাপন কৰি ‘ডি লিট’ উপাধি প্ৰদান কৰে ।
১৯৯২ চনত ‘পদ্মবিভূষণ বঁটা’ প্ৰাপ্ত অটল বিহাৰী বাজপেয়ীদেৱে ১৯৯৪ চনত ক্ৰমে ‘লোকমান্য তিলক বঁটা’ৰ লগতে ‘শ্ৰেষ্ঠ সাংসদৰ বঁটা’ আৰু ‘পণ্ডিত গোৱিন্দ বল্লভ পন্ত’ বঁটা লাভ কৰে ।
২০১৫ চনত এইজনা মহান ব্যক্তিলৈ ভাৰতৰ সৰ্বোচ্চ অসামৰিক সন্মান ‘ভাৰতৰত্ন’ প্ৰদান কৰা হয় ।
২০১৮ চনৰ ১৬ আগষ্ট তাৰিখে ইহলীলা সম্বৰণ কৰা এইজনা মহৎ লোকৰ জীৱনাদৰ্শ, সাহিত্যকৰ্ম , ব্যক্তিত্ব তথা কৰ্মৰাজিয়ে সমূহ ভাৰতীয়কে চিৰদিন উদ্বুদ্ধ কৰি ৰাখিব ।
স্মৃতি-দিৱসত অটল বিহাৰী বাজপেয়ীদেৱলৈ RnrwsIndia24 ৰ তৰফৰ পৰা জ্ঞাপন কৰিছোঁ আন্তৰিক শ্ৰদ্ধাৰ্ঘ ।
