অসমৰ প্ৰথম গ্ৰেজুৱেট, অধিবক্তা, ভাৰতীয় প্ৰশাসনীয় সেৱাৰ পঞ্চম গৰাকী বিষয়া আনন্দৰাম বৰুৱাৰ জীৱনযাত্ৰাঃ

Rnewsindia24.com January 19/2023:- 

আনন্দৰাম বৰুৱা জন্ম হৈছিল ১৮৫০ চনৰ ৫১ মে তাৰিখে উত্তৰ গুৱাহাটীত।

তেখেতৰ পিতৃৰ নাম গৰ্গৰাম বৰুৱা আৰু মাতৃৰ নাম দুৰ্লভেশ্বৰী বৰুৱা আছিল।

আনন্দৰাম বৰুৱা অসমৰ প্ৰথম গ্ৰেজুৱেট, অধিবক্তা আৰু ভাৰতীয় প্ৰশাসনীয় সেৱাৰ তেখেত পঞ্চম গৰাকী বিষয়া আছিল।
লগতে তেখেত সংস্কৃত ভাষাৰ এজন বিদগ্ধ পণ্ডিত আছিল।

আনন্দৰাম বৰুৱাই প্ৰথমে সংস্কৃত শিক্ষা গ্ৰহণ কৰিছিল।
১৪ বছৰ বয়সত তেওঁ কলিকতা বিশ্ববিদ্যালয়ৰ বাছনি পৰীক্ষাত উত্তীৰ্ণ হয়, আৰু কলিকতাৰ ‘প্ৰছিডেন্সী কলেজ’ত এফ. এ. পঢ়িবলৈ লয়।

প্ৰছিডেন্সী কলেজৰ শিক্ষাগুৰু ছাৰ গুৰুদাস বেনাৰ্জীয়ে কৈছিল, “১৮৬৫ চনৰ প্ৰেছিডেন্সী কলেজত কেইবাগৰাকীও চোকা ছাত্ৰ আছিল, তাৰে ভিতৰত আনন্দৰাম বৰুৱা আছিল সবাতোকৈ মেধাবী”।
১৮৬৬ চনত তেওঁ এফ.এ. পৰীক্ষাত প্ৰথম বিভাগৰ ষষ্ঠ স্থান অধিকাৰ কৰে, আৰু গণিত বিভাগত ‘ডাফ’ বৃত্তি লাভ কৰে।
কলিকতা বিশ্ববিদ্যালয়ৰ বি. এ. পৰীক্ষাত তেখেতে তৃতীয় স্থান লাভ কৰে।
ইয়াৰ পাছত তেখেতে উচ্চ শিক্ষাৰ বাবে ইংলেণ্ডলৈ যায়।

১৮৬৯ চনত আনন্দৰাম বৰুৱাই ইংলেণ্ডলৈ যায়।
তেওঁ লণ্ডন বিশ্ববিদ্যালয়ত বিজ্ঞান আৰু ‘মধ্য টেম্পল’ত আইনৰ শিক্ষা গ্ৰহণ কৰে।একলগে তেওঁ প্ৰশাসনীয় সেৱাৰ সহায়িকা বিষয়তো যোগদান কৰে।
১৮৭০ চনত তেওঁ ‘ভাৰতীয় প্ৰশাসনীয় সেৱা পৰীক্ষাত উত্তীৰ্ণ হয়।
১৮৭১ চনত তেখেতে আইনৰ পৰীক্ষাতো উত্তীৰ্ণ হয় আৰু একেটা বছৰতে তেখেতে বি. এছ.চি ডিগ্ৰীও লাভ কৰে।

১৮৭২ চনত আনন্দৰাম বৰুৱা ভাৰতলৈ উভতি আহি শিৱসাগৰ জিলাৰ সহকাৰী কমিছনাৰ পদত যোগদান কৰে।
১৮৮৫ চনত আনন্দৰাম বৰুৱাই কলিকতা বিশ্ববিদ্যালয়ৰ ফেলো নিৰ্বাচিত হয়, আৰু কলা শাখাত সংশ্লিষ্ট হৈ থাকে।

১৮৭৭-১৮৮০ চনৰ ভিতৰত আনন্দৰাম বৰুৱাই তিনিটা খণ্ডত ‘English-Sanskrit Dictionary’ প্ৰণয়ন কৰে।
প্ৰথম খণ্ড প্ৰকাশ হয় ১৮৭৭ চনত তেওঁ বৰ্ধমানত কাৰ্যনিৰ্বাহ কৰি থকাৰ সময়ত।
দ্বিতীয় খণ্ড ‘Higher Sanskrit Grammar’ প্ৰকাশ হয় ১৮৭৮ চনত গোৱালপাৰাত কৰ্মৰত সময়ত।
আনহাতে তৃতীয় খণ্ড ‘Ancient Geography of India’ প্ৰকাশ পায় ১৮৮০ চনত।
১৮৮৭ চনত তেওঁৰ আন এখন মূল্যবান গ্ৰন্থ ‘Companion to Sanskrit-reading undergraduates of the Calcutta University’ প্ৰকাশ হয়।
সেই বছৰতে ‘মহাবীৰ চৰিতম্’ প্ৰকাশ হয়।
ইয়াৰোপৰি ‘সৰস্বতী কথাভৰণম্, ‘নামলিংগানুশসন’, ‘Compilations of a comprehensive dictionary of all Dialects of Bengal’ আদি গ্ৰন্থ ৰচনা কৰে।

অসম চৰকাৰে এখেতৰ সন্মানৰ্থে উচ্চ মাধ্যমিক শিক্ষান্ত পৰীক্ষাত ভাল ফল দেখুওৱাসকলৰ বাবে আনন্দৰাম বৰুৱা বঁটা প্ৰৱৰ্তন কৰিছে।
এই বঁটা প্ৰথম বিভাগত উত্তীৰ্ণ হোৱা পৰীক্ষাৰ্থীসকলৰ মাজত বিতৰণ কৰা হয়।
শিক্ষাৰ্থীসকলে নগদ ধন নাইবা লেপটপ (পূৰ্বে কম্পিউটাৰ) লাভ কৰে।

গুৱাহাটীৰ চানমাৰীত অৱস্থিত এখন উৰনীয়া সেতু “আনন্দৰাম বৰুৱা সেতু”ৰ নাম দিয়াৰ উপৰিও অসমৰ অনেক বাট পথ, শৈক্ষিক প্ৰতিষ্ঠান, ছাত্ৰ-ছাত্ৰী নিবাস, উদ্যান আদি তেখেতৰ নামত নামেৰে নামকৰণ কৰা হৈছে।

১৮৮৯ চনৰ ১৯ জানুৱাৰী তাৰিখে তেখেত মৃত্যু হয়।

অসমৰ গৌৰৱ এই জনা মনীষীয়ে সংস্কৃত ভাষা-সাহিত্যলৈ যি অমূল্য অৱদান আগবঢ়াই থৈ গৈছে, সেইয়া সঁচাই অতুলনীয়।

এনে মহান ব্যক্তিসকলৰ জীৱনযাত্ৰাৰ বিষয়ে জানি থাকিবৰ বাবে চাই থাকিব www.rnewsindia24.com

 

News Editor Sangita Dutta R News India 24