নাৰী দিৱসৰ উৎপত্তি আৰু শুভেচ্ছাৰে Rnewsindia24.com
নাৰী অনন্যা,
নাৰী লাস্যময়ী,
নাৰী হাস্যময়ী,
নাৰী মমতাময়ী,
নাৰী সৃষ্টিৰ পাতনি… কিমান যে অনন্য বিশেষণেৰে বিভূষিত নাৰীৰ পৰিচয়৷
সৃষ্টিৰ আঁৰৰ প্ৰশান্তিৰ অনুভৱেৰে গঁঠা এটি শব্দ হৈছে ‘নাৰী’৷
নাৰী মাত্ৰ দুটি বৰ্ণৰে গঠিত এটি শব্দ নহয়৷
নাৰী হৈছে সৃষ্টিৰ আৱেগ, প্ৰজন্মৰ পৰা প্ৰজন্মলৈ প্ৰৱাহিত সৃষ্টিৰ অপ্ৰতিৰোধ্য শৃংখল৷
এগৰাকী মাতৃ, এগৰাকী পত্নী, এগৰাকী ভগ্নী সকলোৱেই শক্তিৰূপী নাৰী৷
এগৰাকী নাৰীয়ে সমাজৰ পৰা নিজৰ বাবে কেৱল প্ৰাপ্য সন্মান আৰু অকনমাণ মানৱীয়তাৰ আশ্ৰয় কামনা কৰে, যাৰ জৰিয়তে বিশ্বৰ বুকুত সন্মান সহকাৰে জীৱন-যাপনৰ সপোন দেখে৷
নিজৰ প্ৰাপ্য অধিকাৰৰ বাবে, প্ৰাপ্য সন্মানৰ বাবে নাৰী সমাজৰ সংগ্ৰাম দীঘলীয়া আৰু ঐতিহাসিক।
আজিও বহু নাৰী বঞ্চিত হৈ ৰৈছে নিজৰ প্ৰাপ্যৰ পৰা, সন্মানসহ জীয়াই থকাৰ সুবিধাৰ পৰা।
এগৰাকী নাৰী হিচাপে মই আন এগৰাকী মমতাময়ী, প্ৰেৰাণাময়ী নাৰী মোৰ আইৰ সান্নিধ্যৰ পৰাই বুজিব পাৰিছোঁ যে এটা পৰিয়াল আৰু এখন সমাজ নিৰ্মাণত এগৰাকী নাৰীৰ অপৰিহায্য অৱদান তথা ত্যাগৰ বিষয়ে৷
মোৰ আইৰ পৰা মোলৈকে প্ৰবাহিত সেই ধাৰা।
নাৰী সবলীকৰণ আৰু নাৰীৰ প্ৰতি প্ৰগতিশীল দৃষ্টিভংগী পোষণৰ মাজেৰেহে এখন সুস্থ সমাজ আৰু শক্তিশালী ৰাষ্ট্ৰ গঠন কৰা সম্ভৱ।
ভাৰতীয় নাৰীয়ে কঠোৰ প্ৰত্যাহ্বান নেওচি ৰাজনৈতিক ক্ষেত্ৰ তথা সমাজখনত সক্ৰিয়তাৰে অংশগ্ৰহণৰ জৰিয়তে নাৰী সৱলীকৰণৰ ক্ষেত্ৰত এটা নতুন দিশৰ সূচনা কৰা এটা বিপ্লৱী সত্বা হ’ল সৰোজিনী নাইডু৷
উল্লেখ্য যে, দেশৰ প্ৰথম মহিলা ৰাজ্যপাল, ভাৰতত দ্য নাইটেঙ্গেল অৱ ইণ্ডিয়া নামেৰে বিভুষিত সৰোজিনী নাইডুৰ পৱিত্ৰ জন্মদিনটো “ৰাষ্ট্ৰীয় নাৰী দিৱস” ৰূপে সন্মানিত কৰা হয়।
প্ৰতিগৰাকী নাৰীয়ে তেওঁৰ জীৱনাদৰ্শৰে অনুপ্ৰাণিত হৈ সমাজ সেৱাত ব্ৰতী হ’বলৈ আহ্বান জনালোঁ।
আনহাতে, দেশৰ যশস্বী তথা বৰেণ্যা নাৰী যেনে –
ভাৰতৰ প্ৰথমগৰাকী মহিলা ৰাষ্ট্ৰপতি প্ৰতিভা দেৱী সিং পাটিল, ভাৰত প্ৰথম মহিলা প্ৰধানমন্ত্ৰী ইন্দিৰা গান্ধী, ভাৰতৰ প্ৰথম গৰাকী মহিলা মুখ্যমন্ত্ৰী সুচেতা কৃপলানী, ভাৰতৰ প্ৰথম মহিলা মহাকাশচাৰী কল্পনা চাওলা, ভাৰতৰ প্ৰথমগৰাকী মহিলা আত্মজীৱনী লিখক হৰাসসুন্দৰী দেবী, ভাৰতৰ প্ৰথমগৰাকী মহিলা ন্যায়াধীশ আন্না চান্দী, অসমৰ প্ৰথম তথা একমাত্ৰ মহিলা মুখ্যমন্ত্ৰী চৈয়দা আনোৱাৰা টাইমূৰ, অসমৰ প্ৰথম মহিলা শ্বহীদ কনকলতা বৰুৱা, অসমৰ প্ৰথম মহিলা চিকিৎসক ডাঃ সুশীলা টমাছ, এম.বি.বি.এছ. ডিগ্ৰী লাভ কৰা প্ৰথম দুগৰাকী অসমীয়া মহিলা ৰজনীপ্ৰভা দাস আৰু তিলোত্তমা ৰায়চৌধুৰী, ভাৰতীয় বক্সাৰ তথা অলিম্পিকত পদক লাভ কৰা অসমৰ প্ৰথমগৰাকী ক্ৰীড়াবিদ লাভলীনা বৰগোহাঁই, প্ৰথমগৰাকী মহিলা স্নাতক সুধালতা বৰুৱা, বিশ্ব ট্ৰেক আৰু ফিল্ড ইভেণ্টত পদক লাভ কৰা প্ৰথম গৰাকী ভাৰতীয় দৌৰবিদ হিমা দাস ইত্যাদি।
এই স্বনামধন্য নাৰীসকলৰ ত্যাগ, সাহস, জীৱনাদৰ্শ আৰু দেশবাসী লৈ আগবঢ়োৱা অমূল্য অৱদান সমূহে ভাৰত তথা অসমৰ নাৰী সমাজক প্ৰতিটো পল অনুপ্ৰাণিত কৰিব।
হে নাৰী, তোমাৰ অৱস্থিতিয়ে মানৱতাৰ সমাজ খনক জীয়াই ৰাখে।
বৈচিত্ৰময় ভাৰতীয় সভ্যতা-সংস্কৃতিত নাৰীক দেৱী ৰূপে গণ্য কৰা হয়।
আজি আন্তৰ্জাতিক নাৰী দিৱসৰ গৌৰৱৰ ক্ষণত Rnewsindia24.com পৰিয়ালৰ তৰফৰ পৰা প্ৰতিগৰাকী নাৰীক সন্মানৰ দৃষ্টিৰে চোৱা নাৰীৰ স্বাভিমান ৰক্ষাৰ যুঁজত সমৰ্পিত প্ৰতিগৰাকী পুৰুষক আন্তৰিক শুভেচ্ছা জ্ঞাপন কৰিলোঁ৷
শিল্প-সাহিত্য, সমাজ-শিক্ষা, প্ৰজ্ঞা-বিজ্ঞান, ক্ৰীড়া, ৰাজনীতি সকলো ক্ষেত্ৰতে নাৰী সমাজৰ চহকী অৱদানে সমাজখনক পোহৰাই ৰাখক,
আত্মনিৰ্ভৰ মহিলা হ’বৰ বাবে প্ৰতিগৰাকী নাৰীৰ “আগ্ৰহ আৰু আন্তৰিকতা” অধিক সবল হৈ উঠক, প্ৰতিগৰাকী নাৰীয়ে হওঁক সাহস, প্ৰেৰণা, সহযোগিতাৰ এক অতুল্য শক্তি, তাকে মনে-প্ৰাণে কামনা কৰিছোঁ।
লগতে দেশৰ চুকে-কোনে থকা প্ৰতিগৰাকী নাৰীৰ কুশল কামনা কৰিলোঁ।
জানো আঁহক নাৰী দিৱসৰ তাৎপৰ্যঃ
প্ৰতি বছৰৰ ৮ মাৰ্চ তাৰিখে আন্তৰ্জাতিক নাৰী দিৱস পালন কৰা হয়।
পোনপ্ৰথমে এই দিৱস উদযাপন কৰিছিল ১৯১৪ চনত।
পূৰ্বৰ নাম আছিল “আন্তৰ্জাতিক কৰ্মজীৱী নাৰী দিৱস”।
বিশ্বজুৰি মহিলাৰ অধিকাৰৰ প্ৰসাৰৰ বাবে পালন কৰা হয় এই দিৱস।
নাৰী শ্ৰমিকৰ অধিকাৰ, মৰ্য্যদা, প্ৰাপ্য আদায়ৰ সংগ্ৰামৰ ইতিহাস এই দিৱস উদ্যাপনৰ লগত জড়িত হৈ আছে।
১৮৫৭ চনত মজুৰিৰ ক্ষেত্ৰত দেখা পোৱা বৈষম্য, কৰ্মঘণ্টা নিৰ্দিষ্ট কৰা, কৰ্মক্ষেত্ৰৰ অমানৱিক পৰিৱেশৰ বিৰুদ্ধে প্ৰতিবাদ জনাবলৈ মাৰ্কিন যুক্তৰাষ্ট্ৰৰ নিউয়ৰ্কৰ সূতা কাৰখানাৰ নাৰী শ্ৰমিকসকলে আন্দোলন কৰিছিল।
সেই আন্দোলন চৰকাৰে কঠোৰ হাতেৰে দমন কৰিছিল।
১৯০৮ চনত নিউয়ৰ্কৰ সামাজিক গণতান্ত্ৰিক নাৰী সংগঠনে আয়োজিত কৰা নাৰী সমাবেশত জাৰ্মান সমাজতান্ত্ৰিক নেত্ৰী ক্লাৰা জেটকিনৰ নেতৃত্বত সৰ্বপ্ৰথম আন্তৰ্জাতিক নাৰী সন্মিলন অনুষ্ঠিত হৈছিল।
ক্লাৰা এগৰাকী জাৰ্মান ৰাজনীতিবিদ; জাৰ্মান কমিউনিষ্ট পাৰ্টিৰ সদস্য আছিল ।
তাৰপিছত ১৯১০ চনত ডেনমাৰ্কৰ কপেনহেগেনত অনুষ্ঠিত হয় দ্বিতীয় আন্তজাৰ্তিক নাৰী সন্মিলন।
১৭ খন দেশৰ পৰা ১০০ গৰাকী নাৰী প্ৰতিনিধিয়ে তাত অংশগ্ৰহণ কৰিছিল।
সেই সন্মিলনতে ক্লাৰায়ে প্ৰতি বছৰে ৮ মাৰ্চক আন্তৰ্জাতিক নাৰী দিৱস হিচাপে পালন কৰাৰ প্ৰস্তাৱ দিয়ে।
তাৰ ফলশ্ৰুতিত ১৯১১ চনৰপৰা নাৰীসকলৰ সম-অধিকাৰ দিৱস হিচাপে এই দিনটো পালন কৰা হয়।
এই দিৱস পালন কৰিবলৈ বিভিন্ন দেশৰ সমাজ তাত্ত্বিকসকল আগবাঢ়ি আহে।
১৯১৪ চনৰ পৰা কেইবাখনো দেশত ৮ মাৰ্চ দিনটো পালন কৰিবলৈ আৰম্ভ কৰে ।
১৯৭৫ চনত ৮ মাৰ্চক আন্তৰ্জাতিক স্বীকৃতি প্ৰদান কৰা হয়।
এই দিৱস পালন কৰিবলৈ বিভিন্ন ৰাষ্ট্ৰক ৰাষ্ট্ৰসংঘই আহ্বান জনায়।
তাৰ পিছৰপৰা গোটেই পৃথিৱীজুৰি এই দিনটো “আন্তজাৰ্তিক নাৰী দিৱস” পালন কৰে।
২০২৫ চনৰ আন্তৰ্জাতিক নাৰী দিৱসৰ থীম হৈছে “For ALL Women and Girls: Rights. Equality. Empowerment”
এই থীমটোৱে নাৰীসকলক সশক্ত কৰি মানৱতাৰ উন্নয়নৰ বাবে সমতাৰ গুৰুত্বক প্ৰতিফলিত কৰে।
আন্তৰ্জাতিক নাৰী দিৱসৰ প্ৰতীকী ৰং হৈছে বেঙুনীয়া, সেউজীয়া আৰু বগা।
বেঙুনীয়া- ন্যায়, গৌৰৱ, আৰু নাৰীসকলৰ সংগ্ৰামক প্ৰতিনিধিত্ব কৰে।
সেউজীয়া- আশা আৰু পৰিৱৰ্তনৰ প্ৰতীক।
বগা- শুদ্ধতা আৰু শান্তিৰ সৈতে জড়িত।
এই ৰংসমূহে নাৰীসকলৰ একতা আৰু শক্তিৰ প্ৰতীক হিচাপে কাম কৰে।
আহক, আমি সকলোৱে লিংগ বৈষম্যৰ বিপৰীতে প্ৰতিগৰাকী নাৰীৰ প্ৰাপ্য মৰ্য্যাদা, সন্মান আৰু সম অধিকাৰ লাভৰ সুযোগ প্ৰদানৰ বাবে সংকল্প লওঁ।
এনে গুৰুত্বপূৰ্ণ বাৰ্তা সমূহ জানি থাকিবৰ বাবে নিয়মীয়াকৈ পৰিদৰ্শন কৰিব আমাৰ ৱেবছাইট rnewsindia24.com
Sangita Dutta Editor in Chief Rnewsindia24.com
